जागिये कृपानिधान जानराय, रामचन्द्र - jaagen krpaanidhaan janaraee, raamachandr -- तुलसीदास- Tulsidas #www.poemgazalshayari.in ||Poem|Gazal|Shayari|Hindi Kavita|Shayari|Love||

जागिये कृपानिधान जानराय, रामचन्द्र!

जननी कहै बार-बार, भोर भयो प्यारे॥

राजिवलोचन बिसाल, प्रीति बापिका मराल,

ललित कमल-बदन ऊपर मदन कोटि बारे॥

अरुन उदित, बिगत सर्बरी, ससांक-किरन ही,

दीन दीप-ज्योति मलिन-दुति समूह तारे॥

मनहुँ ग्यान घन प्रकास बीते सब भव बिलास,

आस त्रास तिमिर-तोष-तरनि-तेज जारे॥

बोलत खग निकर मुखर, मधुर, करि प्रतीति,

सुनहु स्त्रवन, प्रान जीवन धन, मेरे तुम बारे॥

मनहुँ बेद बंदी मुनिबृन्द सूत मागधादि बिरुद-

बदत 'जय जय जय जयति कैटभारे'॥

बिकसित कमलावली, चले प्रपुंज चंचरीक,

गुंजत कल कोमल धुनि त्यगि कंज न्यारे।

जनु बिराग पाइ सकल सोक-कूप-गृह बिहाइ॥

भृत्य प्रेममत्त फिरत गुनत गुन तिहारे,

सुनत बचन प्रिय रसाल जागे अतिसय दयाल।

भागे जंजाल बिपुल, दुख-कदम्ब दारे।

तुलसीदास अति अनन्द, देखिकै मुखारबिंद,

छूटे भ्रमफंद परम मंद द्वंद भारे॥

- तुलसीदास- Tulsidas

#www.poemgazalshayari.in

||Poem|Gazal|Shayari|Hindi Kavita|Shayari|Love||